newmedia.kz - там, где начинается диалог

Қоғам

ЮНЕСКО Халықаралық Көшпенділер мұрасы күнін бекітті

Фото авторы: Gov.kz

Бұл жаңалықты Мемлекеттік кеңесші Ерлан Қарин жариялап, атап өткеніндей, Қазақстан қабылданған қарардың тең авторы болып табылады.

«Халықаралық Көшпенділер мұрасы күні бекітілді. Мұндай шешім ЮНЕСКО Бас конференциясының 43-ші сессиясында қабылданды. Қазақстан ЮНЕСКО қабылдаған қарардың тең авторы. Бұл — көшпенді халықтардың әлемдік мәдени мұраға қосқан елеулі үлесінің дәлелі», - деп жазды Мемлекеттік кеңесші.

Жаңадан белгіленген мереке жыл сайын 22 қыркүйекте, күзгі күн мен түннің теңелу сәтінде аталып өтеді. Бұл туралы депутат Бибігүл Жексенбай да өз парақшасында бөлісті.

«Көшпенділер мұрасына арналған халықаралық күннің бекітілуі – жай ғана дата емес, адамзаттың ұмыт бола бастаған рухани тамырына қайта үңілуі.
ЮНЕСКО-ның мұндай шешімге келуі – ғасырлар бойы ұлы даланы мекендеген елдердің мәдениет пен өркениетке қосқан үнін мойындау. Бұл үн жаңа заманның да тұғырына айналып отыр.

22 қыркүйек – күн мен түн теңелетін шақ. Табиғаттың өзі тепе-теңдікке келетін осы мезеттің таңдалуы бекер емес. Көшпенді дүниетанымы да дәл осы үйлесімге, табиғатпен жарасымға, уақыт пен кеңістік арасындағы үндестікке құрылған.
Көшпенділер мұрасы – тек өткеннің елесі емес. Ол – бүгінгі жаһандану дәуірінде адамзатқа жетіспей тұрған рухани бағдар да, табиғатпен сөйлесудің тілін үйрететін ұстаз да екенін ұмытпағанымыз жөн. Қазақстанның осы қарардың тең авторы болуы – өз тамырына деген құрметтің, ал әлемнің оны мойындауы – сол тамырдың тереңдігін көрсететін белгі. Тамаша бастама құтты болсын», - деп жазды депутат.