KazTAG халықаралық ақпарат агенттігінің бас директоры Әсет Матаев пен бас редактор Әмір Қасенов қылмыстық іске қатысты күдікті деп танылды. Бұл іс Freedom Finance компаниясының шағымынан кейін қозғалған. Агенттік олардың басшылығына қатысты алаяқтық туралы жәбірленушілердің сөздері келтірілген материалдар жариялаған, деп хабарлайды Newmedia.kz агенттікке сілтеме жасап.

Агенттік адвокатының айтуынша, Матаев пен Қасеновті күдікті деп тану процессуалдық талаптарды сақтамай жүзеге асқан.

«Бұл мәртебені адамның қатысуынсыз тағайындау үшін ол адам тергеуден қашуы немесе әрекеттен жалтаруы тиіс. Ал Матаев та, Қасенов те ешқандай тергеуден қашпаған», – дейді адвокат Рена Керимова.

KazTAG редакциясы өздеріне қатысты қылмыстық іс ашылғанын бірнеше ай бойы білмей келген. Тергеу 18 тамызда басталса да, редакция бұл туралы тек 20 қарашада басқа ақпарат құралдары арқылы ғана хабардар болған. Осы кезең ішінде полиция бірқатар сараптама жүргізгенімен, редакцияға ешқандай ақпарат берілмеген.

Адвокат Ерлан Макенов тергеу барысы Қылмыстық-процестік кодекс талаптарына сәйкес жүргізілмегенін айтты. Оның айтуынша, күдікті тарапқа сараптама тағайындау туралы қаулы көрсетілмеген, бұл – заң нормаларының бұзылуы.

Бұған қоса, 21 қарашада тергеуші Заманбек Тазабеков Қасеновпен сөйлесу кезінде «сұрақтарды оған басшылық дайындайтынын» байқатып қойған. Бұл жайлы сұралғанда, тергеуші «солай істеуді бастықтар тапсырды» деп түсіндірген.

KazTAG редакциясы бұл істі алдағы сайлау алдында жасалып отырған қысым мен үрей туғызу әрекеті ретінде бағалайды. Агенттік бұл істің артында жоғары лауазымды қызметкерлердің болуы мүмкін екенін айтады. Сондай-ақ олар «беделсіз тұлғалар тізімі» жасалып, оған ондаған журналист, құқық қорғаушы және азаматтық белсенді енгізілгенін мәлімдейді.

KazTAG жариялаған материалдардың негізіндегі жәбірленушілер – адвокат Светлана Оралбаева, Гүлмира Исаева, Жанна Капарова және Карина Гайфулина. Олар Freedom Finance компаниясына қатысты шағымдарын жеткізу үшін редакцияға өздері жүгінген. Сонымен қатар Freedom Finance-ке жолданған ресми сұраулардың ешқайсысы жауапсыз қалған.

Агенттік Freedom Finance-тің Ресей санкцияларын айналып өтуге қатысы бар деген айыптаулар бойынша жазылған аудиожазбаны АҚШ пен ЕО елшіліктеріне, сондай-ақ ҚР Ұлттық банкіне, АРРФР-ға және Экономика министрлігіне жолдағанын хабарлады.

Әсет Матаев пен Әмір Қасенов 9 желтоқсанда Алматы қалалық Полиция департаментіне жауап алуға шақырылған.