Алматыда пәтерін жалға беріп, кейін тексеруге келген үй иесі жантүршігерлік көріністен үрейленіп қалған. Пәтерде төңкерілген жиһаз, сынған ыдыс-аяқ және қабырға мен еденде қан іздері болған. Полицейлер тексеріс жүргізіп, пәтерде не болғанын айтты.

Желіде пәтердің видеосы жарияланды. Кадрларда үй ішінде қырғын болғандай көрініс байқалады: жиһаздар төңкерілген, ал қабырғалар, еден, есіктер мен басқа да заттар қанға боялған.

Жазбада бұл жалға берілген пәтер екені айтылады.

Алматы Полиция департаменті Tengrinews.kz сауалына жауап беріп, пәтерде ауыр немесе аса ауыр қылмыс жасалмағанын мәлімдеген.

"Оқиға Бостандық ауданындағы пәтерлердің бірінде болғаны анықталды. Тұрғын үйде апалы-сіңілі қыздар болған. Сынған шыны бөтелке біреуінің аяғын кесіп кеткен. Оқиға орнындағы қанды іздердің көп болуы дәл осы жарақатқа байланысты", - деп хабарлады ведомство.

Сондай-ақ полиция өкілдері қыздармен профилактикалық түсіндіру жұмыстары жүргізілгенін айтты.